Rais wa zamani wa Uruguay, José Mujica, amefariki Dunia akiwa na umri wa miaka 89.
José “Pepe” Mujica, ambaye alikuwa kielelezo cha mrengo wa kushoto na alijulikana kwa mageuzi yake ya kijamii ya kisasa, amefariki dunia Jumanne akiwa na umri wa miaka 89.
“Kwa huzuni kubwa tunatangaza kifo cha rafiki yetu Pepe Mujica,” alitangaza Rais wa Uruguay Yamandú Orsi kupitia mtandao wa X.
“Rais, mwanaharakati, kiongozi na mwongozo. Tutakukosa sana, mzee mpendwa. Asante kwa yote uliyotupa na kwa upendo wako wa dhati kwa watu wako,” alisema Orsi, ambaye alikuwa karibu sana na marehemu.
Mujica, aliyekuwa mwanamapinduzi wa zamani, anakumbukwa sana kwa maisha yake ya kawaida alipokuwa madarakani — akiepuka kuishi katika ikulu ya rais na badala yake kuendelea kuishi kwenye shamba lake la vijijini, ambako aliendeshea shughuli zake za urais.
Mujica alikuwa akiugua saratani kwa zaidi ya mwaka mmoja kabla ya kufariki. Mnamo mwaka wa 2024, aliwaambia waandishi wa habari kwamba angeendelea kupambana kadri ya uwezo wake.
“Nitaendelea kupigana bega kwa bega na wenzangu, nikiwa mwaminifu kwa mtazamo wangu wa maisha, huku nikijifurahisha na mboga zangu na kuku wangu,” alisema. “Kwa yote, ninashukuru – na baada ya yote, huwezi kuchukuliwa kile ambacho tayari umekuwa nacho.”
Mujica ataendelea kukumbukwa kama mmoja wa viongozi walioweka mbele utu, unyenyekevu, na upendo wa kweli kwa watu wake.
