Wabunge wa Bunge la Ulaya wamejadili kwa dharura masuala ya kisiasa nchini Tanzania wakilenga kuhusu kesi ya Mwenyekiti wa CHADEMA Tundu Lissu na hatari ya hukumu yake iwapo atapatikana na hatia ya uhaini ambapo wametoa wito kwa Mamlaka za Tanzania kumuachia Lissu na kuweka mazingira rafiki kwa Vyama vya upinzani ikiwemo CHADEMA kushiriki uchaguzi wa mwaka huu 2025.

Bunge hilo limetoa wito kwa Serikali ya Tanzania kuirejesha CHADEMA katika mchakato wa kisiasa na kuhakikisha kwamba haki za Binadamu, uhuru wa kujieleza, na haki ya kupata haki Mahakamani na pia Serikali ya Tanzania imepewa wito wa kufuta adhabu ya kifo na kubadilisha hukumu zote za kifo.

Baada ya mjadala huo wa jana May 07,2025, Wabunge wa Ulaya wataandaa na kupiga kura juu ya azimio maalum lenye rejea 2025/2690 (RSP) leo May 8, 2025 kuhusu mjadala huo wa kesi ya Lissu ambapo Bunge hilo limetaka taarifa yao iwasilishwe kwa Serikali na Bunge la Tanzania, Umoja wa Afrika na Mwakilishi Mkuu wa Sera za Mambo ya Nje wa EU, kwa lengo la kuanzisha mashauriano ya dhati na yenye matokeo ya kweli kwa maendeleo ya kisiasa ya Tanzania.

Lissu anakabiliwa na mashtaka mawili ambapo moja ni la uchochezi na jingine ni la uhaini ambalo adhabu yake ni kunyongwa endapo atakutwa na hatia.

Tume ya Ulaya imechapisha ramani inayoelezea mipango yake ya kukomesha utegemezi wa Ulaya kwa nishati ya Urusi katika miaka ijayo.

Chini ya mipango hiyo, uagizaji wa gesi yote ya Urusi na gesi asilia ya kimiminika kwa nchi wanachama wa Umoja wa Ulaya utapigwa marufuku kufikia mwisho wa  mwaka 2027.

Kujibu mipango hiyo, msemaji wa Kremlin Dmitry Peskov aliliambia shirika la habari la Reuters siku ya Jumanne kwamba Ulaya ilikuwa ikijiwekea mazingira magumu yenyewe.

EU iliapa kusitisha uhusiano wake wa nishati na Urusi baada ya Moscow kuanzisha uvamizi wake nchini Ukraine mnamo 2022.

Vifungu vya mapendekezo ya kisheria vitawasilishwa mwezi Juni vikitaka nchi zote wanachama wa Umoja wa Ulaya kufanya mipango ya kitaifa ya kukomesha uagizaji wa gesi ya Urusi na mafuta ya nyuklia kulingana na Tume ya Ulaya.

Nchi wanachama wa EU lazima ziwasilishe mikakati chini ya mipango ya kuchukua nafasi ya uagizaji wa mafuta ya Urusi ifikapo mwisho wa 2027.

Nchi pia zimetakiwa kueleza mikakati ya kukomesha utegemezi wao kwa Urusi kwa madini ya urani urani iliyorutubishwa na vifaa vingine vya nyuklia.

Mashambulizi ya ndege zisizo na rubani yamepiga kituo kikubwa cha umeme katika mji wa Port Sudan nchini Sudan na kusababisha kukatika kabisa kwa umeme 

Milipuko na moto mkubwa umeripotiwa karibu na uwanja mkuu wa ndege wa kimataifa wa mji huo huku jeshi la wanamgambo likilenga mji huo muhimu kwa siku ya tatu mfululizo.

Safari za ndege zimekatishwa baada ya ndege zisizo na rubani kugonga uwanja wa ndege wa kimataifa na hoteli karibu na ikulu ya Rais huku Moshi mnene mweusi ukionekana alfajiri kwenye anga ya jiji ambalo hapo awali lilikuwa salama suala lililosababisha  maelfu ya watu wanaokimbia vita vya wenyewe kwa wenyewe vilivyodumu kwa miaka miwili wametafuta hifadhi.

Mapema hii leo  kampuni ya umeme ya Sudan ilisema  kuwa inatathmini uharibifu kwenye kituo chake, ambacho kimetatiza usambazaji wa maji, afya na huduma nyinginezo.