Rais Donald Trump ametangaza  kumteua mshauri wake wa usalama wa kitaifa, Mike Waltz, kuwa balozi wa Marekani katika Shirika la Umoja wa Mataifa.

Trump ametoa tangazo hilo Mei mosi 2025,  kupitia mtandao wake wa kijamii wa Truth Social  huku  Waziri wa Mambo ya Nje Marco Rubio  akatarajiwa kushika nafasi ya Mike Waltz kwa muda.

Tangazo hilo lilitolewa saa chache kufuatia ripoti kuwa  Waltz na naibu wake, Alex Wong, watajiuzulu nafasi zao, wakati shinikizo likizidi kuhusu jukumu la Waltz kwenye kashfa ya Signalgate.

Waltz alimuunga bila kukusudia mwandishi wa habari kwenye kundi ambalo hujadiliana taarifa za siri hususani za mipango ya vita, hatua iliyobua madai ya taarifa hizo kuvuja

Katibu Mkuu wa Umoja wa Mataifa, António Guterres, ametahadharisha kuwa eneo la Mashariki ya Kati lipo katika njia panda kuhusu ahadi ya suluhisho la mataifa mawili katika mzozo kati ya Israel na mamlaka ya Palestina.

Guterres ameliambia baraza la usalama la Umoja wa Mataifa kwamba ahadi hiyo ya suluhisho la mataifa mawili iko hatarini kutoweka kabisa na kuongeza kuwa utashi wa kisiasa wa kufanikisha lengo hilo unaonekana kuwa mbali zaidi sasa kuliko wakati wowote ule.

"Muda unakwenda suluhisho la mataifa mawili liko karibu kufikia hatua isiyoweza kurudi nyuma Jamii ya kimataifa ina jukumu la kuzuia ukaliaji wa kudumu na vurugu." amasema  Guterres

Katibu Mkuu huyo wa Umoja wa Mataifa amehimiza mataifa kuchukua hatua zaidi na si kutoa kauli  pekee na kueleza hatua mahususi za kufufua suluhisho la mataifa  hayo mawili.

Amesema ana wasiwasi mkubwa kuhusu kuzorota kwa hali ya kibinadamu katika ukanda wa Gaza ambapo takribani  Wapalestina 2,000 wameuawa tangu makubaliano ya kusitisha mapigano yaliyofikiwa mwezi Machi yaliposambaratika.

Mahakama kuu huko Abuja nchini Nigeria  imemhukumu Peter Nwachukwu, mume wa mwimbaji maarufu wa injili Osinachi, adhabu ya kunyongwa hadi kifo  baada ya  kupatikana na hatia ya mauaji.

Hukumu hiyo, iliyotolewa na jaji Nwosu-Iheme, imetolewa miaka mitatu baada ya kifo cha osinachi kilichotokea mnamo aprili 8, 2022. Kesi hiyo imejulikana zaidi  kwa sababu ya umaarufu wa Osinachi katika muziki wa injili wa Nigeria na jamii ya wakristo.

Polisi walikuwa wamemkamata bwana nwachukwu baada ya mkewe, kufariki akiwa katika hospitali moja huko Abuja  huku ripoti za awali zikiwa zimependekeza kuwa  mwanamke huyo aliyekuwa na umri wa miaka 42 alikuwa mgonjwa wa saratani ya koo, lakini familia yake ilikataa na kudai kwamba alikuwa mwathirika wa unyanyasaji wa nyumbani.